General Motors kompaniýasy elektrik awtoulaglaryna bolan islegiň aşa köp bahalandyrylmagy sebäpli zyýan çekenden soň, ABŞ-da elektrik awtoulaglarynyň batareýalaryny öndürýän zawodyň gurluşygyny togtatmak kararyna geldi.
Carscoops kompaniýasynyň maglumatlaryna görä, kompaniýanyň çeken zyýany 8,7 milliard dollara deň boldy. Taslama Günorta Koreýanyň Samsung kompaniýasy bilen bilelikde amala aşyrylýardy. Desganyň gurluşygy ilkinji gezek üç ýyl mundan ozal yglan edildi. Maýa goýumlarynyň möçberi 3,5 milliard dollara, iş orunlarynyň sany bolsa 1600-e deň diýlip bahalandyrylýardy.
Zawodyň ýylda 300 000 elektrik awtoulagy üçin batareýa öndürmegine, soňra bolsa kuwwatynyň 360 000-e çenli artdyrylmagyna garaşylýardy. Şeýle-de bolsa, häzirki isleg garaşylýandan pes bolup çykdy.
Indiana ştatyndaky meýdançada esasy binanyň gurluşygy eýýäm tamamlanypdy. Kompaniýa taslamany togtatmazdan ozal korpusy diklemegi we käbir daşarky işleri tamamlamagy meýilleşdirýär.
General Motors kompaniýasy entek taslamany gutarnykly ýatyrmagy göz öňünde tutulmaýandygyny mälim etdi. Kompaniýa önümçilik kuwwatyny häzirki bazar şertlerine laýyklaşdyrmagy we goşmaça kararlary soňra yglan etmegi meýilleşdirýär.
2024-nji ýylda konsern öz paýyny 1 milliard dollara satyp, Miçiganda LG bilen bilelikde başlanan başga bir bilelikdäki batareýa zawodynyň gurluşygyndan ýüz öwrüpdi.
Birinji çärýekde GM-niň ABŞ-daky satuwy 10%-denem azaldy, ýöne käbir elektrik awtoulag modellerine bolan isleg 80% peseldi. Netijede, kompaniýa iki elektrik modeli öndürilýän Detroýt zawodynyň işsiz durmak möhletini uzaltdy.
