Nýu-Ýork uniwersitetiniň Langon Hells lukmançylyk merkeziniň alymlary depressiýany sanlyja minutda anyklamaga mümkinçilik berýän kompýuter oýnuny işläp düzdüler. Medical Press neşiriniň ýazmagyna görä, oýnuň takyklygy kliniki anyklaýyş usullary bilen deňdir.
Bu işlenip düzülen oýun angedoniýany — adamyň öňküler ýaly hezil edip bilmän, höwesiniň gaçmak ýagdaýyny öwrenmäge esaslanýar. Barlagçylaryň maglumatlaryna görä, bu alamat depressiw bozulmasy bolan näsaglaryň takmynan 70%-inde duş gelýär.
Oýny smartfon arkaly uzakdan oýnap bolýar.
Goşundynyň işini 120 adamda barladylar: olaryň 70-si sagdyn gatnaşyjylar, 50-si bolsa depressiýa kesel kesgidi goýlan näsaglardyr. Oýnuň barşynda gatnaşyjylara wirtual agaçlardan gaçýan almalary ýygnamak teklip edildi. Wagtyň geçmegi bilen miweleriň sany azaldy. Şunda oýunçy islendik wagt has köp miweli täze agaja geçip bilýärdi.
Alymlar oýunçylaryň haçan agaç çalşandygyny hasaba aldylar. Sagdyn gatnaşyjylar hasyl ýygnamagy takmynan bäş alma galýança dowam etdiren bolsalar, depressiýaly näsaglar köplenç has ir — sekiz ýa-da dokuz alma galanda ýygnamagy bes edipdirler.
«Biziň bu oýnumyz depressiýaly näsaglaryň beýnisinde nämeleriň bolup geçýändigi barada açar berýär. Bu bolsa, arteriýa gan basyşyny ölçemek arkaly ýürek-damar kesellerini anyklaýşymyz ýaly, depressiýany hem şeýle ygtybarly anyklamaga mümkinçilik berer diýip umyt edýäris» — diýip, Nýu-Ýork uniwersitetiniň Grossman Medisina mekdebiniň Transslýasion neýroylymlar institutynyň direktory Pol Glimçer belledi.
Barlagçylar bu oýnuň angedoniýa bilen baglanyşykly depressiýanyň görnüşlerini uzakdan anyklamak üçin ulanylyp bilinjegini çaklaýarlar.
