Ispaniýaly paleontologlar Teruel welaýatynda takmynan 150 million ýyl mundan ozal ýaşap geçen stegozawryň tas bütinleý saklanyp galan kelleçenegini tapdylar. Alymlar bu tapyndyny Ýewropada şu wagta çenli tapylan iň oňat saklanan stegozawr kelleçenegi diýip atlandyrdylar.
Gözlegiň netijeleri «Vertebrate Zoology» žurnalynda çap edildi.
Daşa öwrülen bu galyndy ýura döwrüniň ahyrynda ýaşap geçen, galyň süňkli plastinalary we tikenleri bolan uly ösümlik iýýän dinozawrlaryň «Dacentrurus armatus» görnüşine degişlidir.
Gözlegçileriň aýtmagyna görä, dinozawrlaryň kelleçeneginiň gowy ýagdaýda saklanyp galmagyna gaty seýrek duş gelinýär, sebäbi olaryň näzik süňkleri adatça ýer gaty we dag jynslarynyň basyşy astynda dargap gidýär. Bu tapyndynyň saýasynda alymlar stegozawrlaryň kellesiniň gurluşyny jikme-jik öwrenmäge we olaryň ewolýusiýasy baradaky maglumatlary takyklaşdyrmaga mümkinçilik gazandylar.
Täze tapylan maglumatlaryň esasynda gözlegçiler şeýle hem «Neostegosauria» atly aýratyn topary tapawutlandyrdylar. Bu topara ýura we irki hek döwürlerinde häzirki Ýewropanyň, Aziýanyň, Afrikanyň we Demirgazyk Amerikanyň çäklerinde ýaşap geçen orta we uly göwreli stegozawrlar girizildi.
Teruelde gazuw-agtaryş işleri dowam edýär. Paleontologlar kelleçenekden başga-da, uly dinozawryň skelet böleklerini we kiçi stegozawr jüýjeleriniň seýrek duş gelýän süňklerini hem tapmagy başardylar.
