Gates Foundation haýyr-sahawat gaznasy 2026-njy ýylyň birinji çärýeginde kompaniýanyň soňky 7,7 million aksiýasyny satyp, Microsoft-yň maýasyndan doly çykdy.
Ýerleşdirilen bukjananyň bahasy 3,2 milliard dollar diýlip bahalandyrylýar. Bu satuw Bill Geýtsiň 1975-nji ýylda esaslandyran kompaniýasyndaky paýynyň köp ýyllyk kemeldilmeginiň jemleýji tapgyry boldy.
Gaznadan aksiýalaryň satuwynyň maýa goýum bukjasyny meýilnamalaýyn dolandyrmagyň çäginde amala aşyrylandygyny mälim etdiler. Alnan serişdeleri guramanyň ynsanperwer taslamalaryna gönükdirmek meýilleşdirilýär.
Bu karar Bill Geýtsiň öz baýlygynyň esasy bölegini kem-kemden haýyr-sahawat işlerine bermek we wagtyň geçmegi bilen gaznanyň işini bes etmek baradaky öňden mälim edilen meýilnamalary bilen baglanyşyklydyr.
«Men baýlygymyň tas ählisini gazna bermegi meýilleşdirýärin. Men sanawda aşak düşerin we netijede dünýäniň iň baý adamlarynyň sanawyndan çykaryn» diýip, Geýts aýdypdy.
Microsoft üçin bu satuw hiç hili operasion netijeleri bermeýär. Bill Geýts eýýäm 2020-nji ýylda kompaniýanyň direktorlar geňeşinden çykyp, işjeň dolandyryşdan daşlaşypdy.
Bilermenler bu wakanyň simwoliki ähmiýetini belleýärler: Microsoft esaslandyrylandan bäri ilkinji gezek onuň döredijisiniň ady bilen baglanyşykly iň iri haýyr-sahawat gaznasy korporasiýanyň aksiýalaryna eýelik etmeýär.
Microsoft-yň maýasyndan çykandan soň, gaznanyň öz aktiwlerini tehnologik, ekologik we ynsanperwer taslamalaryň arasynda has çeýe paýlap bilmegine garaşylýar.
