Fransiýanyň LVMH kompaniýasy otuz ýyla golaý eýelik eden Marc Jacobs brendini WHP Global kompaniýasyna satmak barada ylalaşyk baglaşdy.
Marc Jacobs-yň paýnamalarynyň gözegçilik bukja bölegi 1997-nji ýylda LVMH tarapyndan satyn alnypdy. Brendiň özüni bolsa 1984-nji ýylda dizaýner Mark Jeýkobs we telekeçi Robert Daffi esaslandyrypdy.
Kompaniýanyň beren habaryna görä, Marc Jacobs WHP Global-yň ýokary hilli moda boýunça iň esasy brendine öwrüler. Kompaniýanyň portfelinde eýýäm Vera Wang, rag & bone we G-STAR ýaly brendler bar. Söwda doly tamamlanandan soň, WHP Global-yň dünýä boýunça bölek satuw dolanyşygynyň 9,5 milliard dollardan geçmegine garaşylýar.
LVMH-iň beýanatynda G-III Apparel Group kompaniýasynyň hem Marc Jacobs-yň peýdasyna öwrüljekdigi bellenilýär. Brendiň dünýä boýunça göni we lomaý satuwlar bilen baglanyşykly söwdasynyň bir bölegi şol kompaniýa geçer.
Söwda şertnamasynyň ýylyň ahyryna çenli doly tamamlanmagyna garaşylýar.
Ozal Financial Times neşiri LVMH kompaniýasynyň Amerikadaky birnäçe aktiwlerini, şol sanda Marc Jacobs-y we aýdymçy Riannanyň Fenty Beauty brendindäki paýyny satmak mümkinçiliklerini gözden geçirýändigini habar beripdi.
Mälim bolşy ýaly, LVMH kompaniýasy Louis Vuitton, Givenchy, Guerlain, Kenzo, Moet & Chandon we Hennessy ýaly meşhur brendler arkaly önüm öndürýär. Kompaniýanyň esasy dolandyryş edarasy Parižde ýerleşýär.
