ITMO uniwersitetiniň we Kant adyndaky Baltika federal uniwersitetiniň alymlary sagdyn öýjüklere zeper ýetirmezden, deri çişlerine garşy dermanlary maksatly goýbermek üçin material işläp düzdüler.
Bu tehnologiýa gialuron kislotasyndan ýasalan polimer plýonkalaryna esaslanýar. Alymlar olary rak keseline garşy häsiýetlere eýe, ýöne suwda gowy eremeýän we sagdyn dokumalar üçin zäherli bolup biljek maddalar üçin daşaýjy hökmünde ulandylar. Materialyň düzüminde kurkumadan alynýan kurkumin we lişaýniklerde tapylan usnin kislotasy bar.
Plýonkalar deriniň zeperlenen ýerine gönüden-göni aýratyn bejergi hökmünde ýapylyp ýa-da sargynyň işjeň gatlagy hökmünde ulanylyp bilner. Bu tehnologiýa bejerginiň dürli usullarynda nanosüýümleri, gelleri we nanobölejikleri döretmäge hem mümkinçilik berýär.
Işläp düzüjiler önümçilikde hiç hili zäherli erginleriň ýa-da katalizatorlaryň ulanylmaýandygyny, şonuň üçin materialyň doly bio ylalaşyklydygyny belleýärler.
Öýjük ösdüriş synaglary plýonkalaryň sagdyn dokumalara täsir etmezden, melanomanyň öýjüklerini öldürýändigini görkezdi. Barlagçylaryň sözlerine görä, bu tehnologiýa deri rakynyň ýerli bejergisi üçin hem, himioterapiýanyň dozasyny azaltmak we çiş aýrylandan soň, çiş öýjükleriniň köpelmeginiň öňüni almak üçin hem adaty bejergä goşmaça hökmünde ulanylyp bilner.
