Braziliýaly üç uýa jemi 316 ýaşap, uzak ýaşamak boýunça dünýä rekordyny goýdy. Bu barada Need To Know neşiri habar berdi.
Süýtdeş uýalar Lewita, Zoraida we Zuliny de Deus Nunes häzirki wagtda dünýäde ýaşap ýören iň ýaşy uly üç dogan hökmünde resmi taýdan ykrar edildi. Gyz doganlaryň iň ulusy 108 ýaşynda, ortanjysy 104, iň kiçisi bolsa 103 ýaşynda.
Olar Braziliýanyň demirgazyk-gündogaryndaky Seržipi ştatynda sekiz çagaly maşgalada dünýä indiler. 1917-nji ýylyň iýunynda doglan Lewita ýaşlygynda öý hojalykçy bolan bolsa-da, soňra Rio-de-Žaneýro şäherine göçüpdir we milli teleýaýlyma işe ýerleşipdir. 1921-nji ýylyň noýabrynda doglan Zoraida ilki başlangyç synp mugallymy bolup işläpdir. Soňlugy bilen degişli okuw jaýyny tamamlap, şepagat uýasy hünärini ele alypdyr. Iň kiçi uýalary Zulina bolsa 1923-nji ýylyň martynda dünýä inip, el işleri bilen meşgullanyp, özüniň alty çagasyny-da ylymly-bilimli adamlar edip ýetişdiripdir.
Belläp geçmeli zady, bu maşgalada uzak ýaşan diňe olar däldir. Uýalaryň ejesi Žowelina we bir daýzalary ýüz ýaşdan aňryk geçmegi başarypdyr. Ýaşlarynyň mazalyja bolandygyna garamazdan, uýalar biri-biri bilen örän ýakyn gatnaşykda ýaşaýarlar.
Häzirki wagtda olar dünýäde ýaşap ýören iň garry üç dogan diýen tituly göterýän hem bolsalar, entek tutuş taryhyň absolýut rekordyny täzeläp bilmediler.
«LongeviQuest» taslamasynyň berýän maglumatlaryna görä, taryhdaky absolýut rekord amerikaly uýalar Meggi Renfro (1895–2010), Kerri Li Miller (1902–2010) we Rozi Li Warren (1906–2009) dagylara degişlidir. 2009-njy ýylyň dekabrynda Warren aradan çykan pursadynda, bu üç uýanyň umumy ýaşy 325-e ýetipdi.
