Emirates awiakompaniýasy Starlink hemra interneti gurnalan ilkinji Airbus A380 uçaryny ulanylyşa girizdi. Bu ulgam ähli klaslardaky ýolagçylary mugt Wi-Fi bilen üpjün edýär.
Kompaniýa bu tehnologiýanyň ornaşdyrylandygy barada täze ulgamly uçaryň suratyny çap edenden soň habar berdi. Emirates kompaniýasynyň bu habaryny tiz wagtdan SpaceX-iň ýolbaşçysy Ilon Mask hem öz sahypasynda paýlaşdy.
Awiakompaniýanyň maglumatlaryna görä, häzirki wagtda Emirates-iň 33 sany uçary Starlink ulgamyny goldaýar. Geljekde awiagatnadyjy şeýle laýnerleriň sanyny 232-ä çenli köpeltmegi meýilleşdirýär.
Täze ulgamly uçarlar eýýäm Ýakyn Gündogara, Aziýa-Ýuwaş umman sebitiniň ýurtlaryna, Ýewropa, Afrika we Amerika gatnawlary amala aşyrýar.
Ýolagçylara uçuş wagtynda doly derejeli internet elýeterliligi wada berilýär. Bu ulgam göni ýaýlymda wideolary görmäge, onlaýn oýunlary oýnamaga, şol bir wagtyň özünde birnäçe enjamy birikdirmäge, söwda etmäge we göni uçaryň içinde internet torunda işlemäge mümkinçilik berýär.
