Ýewropa Bileleşiginiň serhet gullugy bolan Frontex agentliginiň berýän maglumatlaryna görä, 2026-njy ýylyň ýanwar-aprel aýlary aralygynda ÝB-niň serhetlerinden bikanun geçmek synanyşyklary geçen ýylyň degişli döwri bilen deňeşdirilende 40% azaldy.
Guramanyň hasabatynda 2026-njy ýylyň başyndan bäri ÝB-niň çägine bikanun ýollar bilen giren adamlaryň sanynyň 29 müňden hem az bolandygy we bu görkezijiniň soňky ýyllaryň iň pes derejesi hökmünde hasaba alnandygy aýdylýar. Ýatlap geçsek, 2023-nji ýylda şeýle ýagdaýlaryň sany häzirki görkezijiden takmynan üç esse köp bolupdy.
Häzirki wagtda bikanun göçüşligiň iň esasy ugry hökmünde Ortaýer deňziniň merkezi bölegi, ýagny Liwiýadan Italiýanyň kenarlaryna barýan ýol galýar. Ikinji esasy ugur bolsa Türkiýäniň üsti bilen Gresiýa we Kipre barýan Gündogar Ortaýer deňzi ýoludyr. Bu iki ugra Ýewropa Bileleşigine bikanun girmäge synanyşýanlaryň takmynan üçden biri degişlidir.
Frontex gullugy şonuň bilen birlikde, 2025-nji ýylyň netijeleri boýunça hem ÝB-ne bikanun girenleriň sanynyň ondan öňki ýyl bilen deňeşdirilende 25% azalandygyny-da ýatlatdy.
