«Awtomobil ulag hyzmaty» AGPJ 2026-njy ýylyň 25-nji maýyndan başlap, Aşgabat – Awaza – Aşgabat ugry boýunça yzygiderli awtobus gatnawynyň başlanjakdygyny mälim etdi. Täze ugur tomus möwsüminde raýatlaryň Hazar deňziniň kenaryna bökdençsiz barmagyny üpjün etmek maksady bilen ýola goýuldy.
Gatnawlar her gün amala aşyrylar. Awtobuslar Aşgabatdan ir sagat 06:00-da, wokzalyň golaýyndaky awtoduralgadan ugrar. «Awaza» milli syýahatçylyk zolagyndan yza gaýdyşyn bolsa sagat 13:00-da Ýelkenli köçesinde ýerleşýän 266 orunlyk awtoduralgadan ýola çykar.
Petekleri Aşgabadyň Halkara awtomenzilinden, Awtokombinatyň we Wokzalyň kassalaryndan satyn alyp bilersiňiz. Şeýle hem şäherara ugurlar üçin niýetlenen ykjam goşundydan sanly ulgam arkaly onlaýn bronlamak mümkinçiligi döredildi.
Goşmaça maglumatlar şu telefon belgilerine ýüz tutup bilersiňiz: 44-35-30, 44-35-20 we +99361-49-34-95.
Habarda bellenilişi ýaly, Awaza 2026-njy ýylyň tomus möwsümine doly taýýar edildi. Bu ýerde 10 müňden gowrak syýahatçyny kabul etmäge ukyply 18 sany döwrebap myhmanhana, şeýle hem çagalaryň we maşgalalaryň dynç almagy üçin niýetlenen merkezler myhmanlary kabul etmäge garaşýar.
