Wenanyň «Wiener Stadthalle» arenasynyň sahnasynda geçirilen iki sany saýlama tapgyryň netijeleri boýunça «Ýewrowideniýe-2026» halkara aýdym-saz bäsleşiginiň final tapgyryna gatnaşjaklaryň ählisi kesgitlendi.
Bäsleşigiň birinji ýarym finaly 13-nji maýa — çarşenbe gününe geçilýän gije tamamlandy. Final üçin 10 sany ýollama ugrunda 15 ýurduň wekilleri bäsleşdi.
Birinji saýlama tapgyrdan bäsleşigiň esasy faworitleri: Finlýandiýadan skripkaçy Linda Lampenius we aýdymçy Pete Parkkonen dueti, şeýle hem Gresiýadan Akylos üstünlikli geçmegi başardy. Olardan başga-da, Ysraýylyň, Moldowanyň, Şwesiýanyň, Horwatiýanyň, Litwanyň, Polşanyň, Serbiýanyň we Belgiýanyň wekilleri finala çykdy.
Ikinji ýarym final bolsa 15-nji maýa — anna gününe geçilýän gije geçirildi. Sahnada ýene-de 15 döwletiň wekilleri çykyş edip, finalyň soňky on orny ugrunda bäsleşdi. Ses bermegiň netijeleri boýunça finalçylaryň ikinji toparyna Ukrainanyň, Awstraliýanyň, Daniýanyň, Albaniýanyň, Bolgariýanyň, Kipriň, Maltanyň, Norwegiýanyň, Rumyniýanyň we Çehiýanyň wekilleri girmegi başardy.
Şunlukda, 17-nji maýa — ýekşenbe gününe geçilýän gije boljak bäsleşigiň aýgytlaýjy tapgyrynda jemi 25 döwletiň wekilleri çykyş eder: her ýarym finaldan 10 sany ýeňiji, bäsleşigi kabul edýän ýurt Awstriýa, şeýle hem «Uly dörtlüge» girýän ýurtlar — Beýik Britaniýa, Germaniýa, Italiýa we Fransiýa.
