Türkmenistan 9–10-njy maýda Özbegistanyň Daşkent şäherinde «Gündogaryň merjeni» ady bilen geçiriljek ahalteke bedewleriniň atly sport we gözellik bäsleşiklerine gatnaşar. Bu barada anna güni geçirilen Hökümet mejlisinde wise-premýer T.Atahallyýew mälim etdi diýip, «Watan» habarlar gepleşigi habar berýär.
Ministrler Kabinetiniň Başlygynyň orunbasary wekilçilikli toparyň goňşy ýurduň paýtagtyna ugradylmagyna görülýän taýýarlyk barada hasabat berdi. Ol şeýle çärelere gatnaşmagyň milli atşynaslyk sungatyny dünýä ýaýmaga ýardam edýändigini belledi.
Daşkentdäki çäreleriň maksatnamasyna «Ahalteke bedewi — halklaryň dostlugynyň nyşany» atly maslahat, şeýle hem sport ýaryşlary girýär.
Prezident Serdar Berdimuhamedow «Garaşsyz, baky Bitarap Türkmenistan — bedew batly at-myradyň mekany» şygary astynda geçýän ýylda daşary ýurtlarda şeýle halkara çäreleriň geçirilmeginiň behişdi bedewleriň şan-şöhratyny belende götermekde möhüm ähmiýete eýedigini belledi.
Döwlet Baştutany goňşy ýurtda geçiriljek bäsleşiklere türkmen atşynaslarynyň we bedewleriniň ýokary guramaçylykly derejede gatnaşmagyny üpjün etmegi tabşyrdy.
