Internetde Samsung Galaxy Glasses akylly äýnekleriniň suratlary peýda boldy. Android Headlines tarapyndan çap edilen ýokary hilli renderlere görä, enjam daşky görnüşi boýunça nusgawy Ray-Ban äýneklerini ýatladýar, ýöne onuň gapdallarynda surat we wideo düşürmek üçin ýörite kameralar ýerleşdirilipdir.
Äýnekler Google Gemini emeli aňy bilen üpjün edilen Android XR platformasynda işlär. Enjamda hiç hili ekran göz öňünde tutulman, dolandyryş diňe ses bilen amala aşyrylar. Ulanyjy sesli buýruklar arkaly ýazgylary terjime edip, howa maglumatyny alyp, sowallaryna jogap tapyp we surata alyp biler.
Habar berilişine görä, enjam Qualcomm Snapdragon AR1 prosessory, 155 mAs göwrümli akkumulýator we 12 MP durulygyndaky Sony IMX681 sensorly kameralar bilen üpjün ediler. Şeýle-de, onda Wi-Fi we Bluetooth modullary göz öňünde tutulypdyr.
Galaxy Glasses äýnekleriniň bahasynyň 379 dollardan 479 dollara çenli bolmagyna we şu ýylyň dowamynda satuwa çykarylmagyna garaşylýar.
Kompaniýa 2027-nji ýylda enjamyň has kämilleşen, ýagny microLED-displeýli görnüşini hem hödürläp biler.
