Türkmenistanyň Prezidenti Serdar Berdimuhamedowyň tabşyrygy boýunça Mejlisiň Başlygy Dünýägözel Gulmanowa Müsür Arap Respublikasynyň Türkmenistandaky Adatdan daşary we Doly ygtyýarly ilçisi Hamdi Şaaban Abdelhalim Mohamedden ynanç hatyny kabul etdi.
Parlamentiň ýolbaşçysy döwlet Baştutanynyň adyndan diplomaty täze wezipä bellenilmegi bilen gutlady we ikitaraplaýyn gatnaşyklary ösdürmekde oňa üstünlikleri arzuw etdi.
Ilçi mähirli kabul edilendigi üçin minnetdarlyk bildirdi we Müsüriň ýolbaşçylarynyň Türkmenistanyň Prezidentine iberen mähirli salamyny hem-de iň gowy arzuwlaryny ýetirdi.
Duşuşygyň dowamynda diplomat ýurduň içeri we daşary syýasatynyň esasy ugurlary, amala aşyrylýan özgertmeler we iri taslamalar bilen tanyşdyryldy. Şeýle hem Mejlisiň düzümi we kanunçylygy kämilleşdirmek boýunça alyp barýan işleri barada maglumat berildi.
Taraplar türkmen-müsür hyzmatdaşlygynyň dürli ugurlaryny, şol sanda BMG-niň we beýleki halkara guramalaryň çäklerindäki gatnaşyklary maslahatlaşdy.
Duşuşygyň ahyrynda ilçi özara hyzmatdaşlygy has-da ösdürmek üçin ähli tagallalaryny etjekdigine ynandyrdy.
