Polşaly 23 ýaşly bloger Patrik Garkowski (internetdäki ady Łatwogang) onkologik keselli çagalara kömek etmek üçin geçirilen onlaýn haýyr-sahawat çäresinde Ginnesiň rekordyny goýdy. Dokuz günläp dynuwsyz dowam eden göni efirde ol 250 million polşa zlotysyndan (takmynan 60 million ýewro ýa-da 69 million dollar) gowrak pul ýygnamagy başardy.
17-nji aprelde başlanan bu taslama «Cancer Fighters» gaznasyny goldamak üçin niýetlenipdi. Ilkibaşda 500 müň zloty ýygnamak meýilleşdirilse-de, adamlaryň işjeňligi netijesinde bu maksada derrew ýetildi we ýygnamak işi dowam etdirildi.
Bloger Warşawadaky studiýasyndan dokuz günläp yzygiderli efir alyp bardy. Ol şonça wagtyň dowamynda kesel bilen göreşýän çagalara bagyşlanan «Men henizem şu ýerde» («I’m still here») atly aýdymy gaýtaladyp diňledi. Bu aýdymy polşaly reper Bedoes 2115 we kesel bilen göreşýän 11 ýaşly Maja Mesan bilelikde ýazypdy.
Ägirt uly haýyr-sahawat marafonynda meşhur sungat we sport ýyldyzlary hem işjeňlik görkezdiler. Marafona ilkinjileriň hatarynda goşulan «Coldplay» rok toparynyň ýolbaşçysy Kris Martin klawişli saz guralyndaky improwizasiýasyny görkezýan wideo ýüzlenme ugradyp, tomaşaçylary haýyr-sahawat puluny köpeltmäge çagyrdy.
Polşanyň adyndan çykyş edýän konkiçi Wladimir Semirunniý öz Olimpiýa medalyny bagyş etdi we kesel çagalara duýgudaşlyk hökmünde saçyny syrdyrdy.
Dünýä derejeli ýyldyzlar hem sosial ulgamlarda bu çäräni işjeň goldadylar. Olardan «Barselonanyň» we Polşanyň milli ýygyndysynyň futbolçysy Robert Lewandowski TikTok-da haýyr-sahawat aýdymynyň astynda tans etdi we 230 000 ýewrodan gowrak pul bagyşlady. Onuň kärdeşi, derwezeçi Woýseh Şensnyý bolsa Ispaniýanyň milli ýygyndysynyň oýunçysy Lamin Ýamal bilen bilelikde wideo ýazgy düşürdiler. Tennis boýunça «Uly tuwulganyň» alty gezek çempiony Iga Swýontek hem 23 müň ýewrodan gowrak pul goşdy we öz oýnuna petek sowgat etdi.
Efire iň köp tomaşa edilýän pursatda 1,6 million adam birden goşuldy. Bu görkeziji 2025-nji ýylda fransuzlaryň «Z Event» taslamasy tarapyndan goýlan 16,2 million ýewrolyk öňki rekordy hem täzeledi. Ýygnalan ähli serişdeler keselli çagalara we olaryň maşgalalaryna kömek etmek üçin gönükdiriler.
