Ilon Mask ýokary derejeli gizlinlige we Grok emeli aňa esaslanýan täze XChat messenjerini resmi taýdan tanyşdyrdy. Birnäçe gezek yza süýşürilenden soň, programma ahyrsoňy App Store-yň daşary ýurtdaky ulanyjylaryna elýeterli boldy.
Häzirki tapgyrda hyzmat diňe iPhone-larda işleýär. Android üçin niýetlenen wersiýasy bolsa heniz işlenip düzülýär.
XChat-yň esasy aýratynlygy maglumatlaryň howpsuzlygyna berilýän uly üns. Işläp düzüjiler doly derejeli şifrlemäniň ulanylýandygyny, munuň bolsa X platformasynyň ulanyjylaryň hatlaryna we faýllaryna girmegini doly aradan aýyrýandygyny mälim edýärler.
Programmanyň funksionallygy skrinşotlary almagyň öňüni almagy, gizlin çatlary döretmegi we bäş minutdan soň öz-özünden öçýän hatlary ibermek mümkinçiligini öz içine alýar. Mundan başga-da, ulanyjylar öz hatlaryny hiç hili çäklendirmesiz hemme gatnaşyjylardan öçürip bilýärler.
Messenjere xAI kompaniýasynyň Grok emeli aň kömekçisi hem ornaşdyryldy. Ol göni hat alyşmalaryň içinde maglumatlaryň hakykatdygyny barlamaga we dürli mazmunlar bilen işlemäge kömek edýär.
Hyzmat sesli we wideogepleşikler, dürli formatdaky faýllary ibermek hem-de 500 adama çenli toparlaýyn çatlary döretmek ýaly adaty funksiýalary hem goldaýar.
Ulgama hasaba durmaklyk X sosial ulgamyndaky bar bolan hasabyň üsti bilen amala aşyrylýar, bu bolsa telefon belgisini birikdirmek zerurlygyny aradan aýyrýar. Programmada mahabat düýbünden ýokdur.
Aslynda messenjeri 17-nji aprelde işe girizmek meýilleşdirilipdi, emma tehniki kämilleşdirmeler we App Store-a çykarmak bilen bagly kynçylyklar sebäpli, işe girizmeklik bir hepde yza süýşürildi.
