23-nji aprelde Türkmenistanyň daşary işler ministriniň orunbasary Mähri Bäşimowa BMG-niň Ösüş Maksatnamasynyň (BMGÖM) Türkmenistandaky Hemişelik wekili Narine Saakýan bilen duşuşdy. Bu barada daşary syýasat edarasynyň metbugat gullugy habar berýär.
Söhbetdeşligiň dowamynda 2026–2030-njy ýyllar üçin niýetlenen Ýurt boýunça maksatnamanyň çäklerinde amala aşyrylýan hyzmatdaşlygyň häzirki ýagdaýy we geljekki ugurlary ara alyp maslahatlaşyldy. Taraplar döwlet dolandyryşy, sanlylaşdyrma, ykdysady ösüş we howanyň üýtgemegi ýaly ugurlarda bilelikdäki başlangyçlaryň sanynyň yzygiderli artýandygyny belledi.
Duşuşykda Türkmenistanyň Durnukly ösüş maksatlaryny durmuşa geçirmek boýunça üçünji Meýletin milli synyny 2027-nji ýylda BMG-niň Ykdysady we Durmuş Geňeşiniň ýokary derejedäki Syýasy forumynyň çäklerinde hödürlemäge taýýarlyk meselelerine aýratyn üns berildi.
Şeýle hem DÖM-i maliýeleşdirmegiň döwrebap gurallaryny ornaşdyrmakda Açyk söhbetdeşlik formatynyň netijeli meýdança bolup hyzmat edýändigi nygtaldy. Gepleşikleriň ahyrynda taraplar durmuşa geçirilýän taslamalaryň netijeliligini ýokarlandyrmak we pudagara hyzmatdaşlygy mundan beýläk-de çuňlaşdyrmak barada ylalaşdy.
