2027-nji ýylyň 18-nji fewralyndan Ýewropa Bileleşiginiň bazarynda öndürijileri smartfonlary we planşetleri aýryp-dakylýan batareýalar bilen üpjün etmäge borçlandyrýan täze düzgünler güýje girer. 2023-nji ýylda tassyklanan bu çäre elektron galyndylaryny düýpli azaltmaga we göçme tehnikalary abatlamagy ýeňilleşdirmäge gönükdirilendir.
Düzgünnama laýyklykda, enjamlaryň gurluşy ulanyjylara hünärmenleriň kömegine ýa-da çylşyrymly gurallara mätäç bolmazdan, batareýany özbaşdak çykarmaga we çalşyrmaga mümkinçilik bermelidir.
Öndürijiler belli bir modeliň öndürilişi bes edilenden soň hem, bäş ýylyň dowamynda ätiýaçlyk batareýalaryň satuwda bolmagyny üpjün etmäge borçly bolarlar. Eger batareýany çalşyrmak üçin ýörite gural gerek bolsa, kompaniýa ony enjam bilen bilelikde müşderä mugt bermelidir.
Häzirki wagtda enjamlaryň köpüsi aýryp-dakylmaýan batareýalar bilen öndürilýär. Bu bolsa, batareýa zaýalanan wagtynda sarp edijileri täze enjam almaga mejbur edýär.
