Britan parlamentiniň iki palatasy hem 2009-njy ýylyň 1-nji ýanwaryndan başlap doglan ähli raýatlara temmäki önümlerini we elektron çilimleri satmagy ömürlik gadagan edýän taryhy kanun taslamasyny tassyklady.
Ýurtda «çilimden azat ilkinji nesli» kemala getirmäge gönükdirilen bu başlangyç, indi resmi taýdan güýje girmegi üçin patyşa Karl III tarapyndan gol çekilmegine garaşýar.
«Bi-bi-si» gullugynyň habar bermegine görä, «Weýp we çilim hakyndaky kanun» diňe bir satmagy gadagan etmek bilen çäklenmän, eýsem häkimiýetleriň nikotin önümleriniň düzümine gözegçilik etmek boýunça ygtyýarlyklaryny hem giňeldýär. Indi temmäki önümleriniň we elektron çilimleriň ys berijileri hem-de gaplamalarynyň dizaýny hem düzgünleşdiriler.
«Bu örän ähmiýetli kanun taslamasydyr, ol çilimden azat nesli döreder» – diýip, Lordlar palatasynda Döwlet sekretarynyň zenanlaryň saglygy baradaky meseleler boýunça orunbasary baronessa Jilliýan Meron belledi.
Kanunyň iş mehanizmi temmäki satyn almak üçin iň pes ýaşyň her ýyl ýokarlandyrylmagyny göz öňünde tutýar. Şeýlelikde, ýaş çägi 2009-njy ýylda we ondan soň doglan raýatlaryň ýaşy bilen bilelikde süýşer, bu bolsa wagtyň geçmegi bilen Beýik Britaniýanyň ähli ilatyna çilim satylmagynyň hakyky gadagan edilmegine getirer.
Bu kanun taslamasyna 2023-nji ýyldan bäri seredilip gelinýärdi.
