Türkmenistan TÜRKSOÝ-yň howandarlygynda surata düşürilýän «Molla Nasreddin — kyn günleriň dosty» atly halkara çeper filminiň surata düşüriş meýdançalarynyň birine öwrüldi. Bu barada «Türkmenistan: Altyn asyr» neşiri habar berýär.
Taslamanyň döredijilik toparyna Azerbaýjanyň, Türkiýäniň, Özbegistanyň, Gazagystanyň, Gyrgyzystanyň we Türkmenistanyň kino sungatynyň ussatlary çekildi. Film Oguzhanyň adyny göterýän «Türkmenfilm» birleşiginiň işjeň kömegi bilen amala aşyrylýar. Surata düşüriş işleriniň şu ýylyň tomsuna çenli tamamlanmagyna garaşylýar.
Film üçin Ahal welaýatynyň gözel künjekleri — Gäwers obasy we Bokurdak şäherçesi saýlanyp alyndy. Bu ýerler sebitiň tebigy öwüşginini görkezmekde tapylgysyz künjeklerdir. Garagumuň uç-gyraksyz çägelerinde düşürilen kerwenli pursatlara Türkmenistanyň halk artisti Çary Seýtliýew we sungat ugrunda bilim alýan talyplar gatnaşdylar.
Filmiň ssenariýasynyň awtory we goýujy režissýory, Azerbaýjanyň halk artisti Wagif Mustafaýew Molla Nasreddiniň keşbiniň bu filmde diňe bir gülki däl, eýsem, paýhasyň we jemgyýetçilik meselelerine tankydy garaýşyň nyşany hökmünde açyp görkezilýändigini belleýär.
Taslama «TÜRKSOY» guramasy tarapyndan resmi goldaw alyp, 2023-nji ýylyň oktýabrynda Şuşa şäherinde geçirilen Türki dünýäsiniň medeniýet forumynda tassyklanypdy.
