Tailand Patyşalygynyň Bangkok şäherinde BMG-niň Aziýa we Ýuwaş ummany sebiti boýunça Ykdysady we durmuş meseleleri boýunça komissiýasynyň (UNESCAP) ştab-kwartirasy bolan BMG-niň Maslahatlar merkezinde ESCAP-yň 82-nji sessiýasy öz işine başlady. Bu barada Türkmenistanyň DIM-i habar berýär.
2026-njy ýylyň 24-nji apreline çenli dowam etjek bu halkara forumda Türkmenistana Maliýe we ykdysadyýet ministriniň orunbasary Perhat Ýagşyýewiň ýolbaşçylygyndaky wekiliýet wekilçilik edýär. Sessiyanyň esasy mowzugy Aziýa-Ýuwaş umman sebitinde ähli ýaşdaky adamlar üçin hemmetaraplaýyn jemgyýeti kemala getirmek we durnukly ösüşi üpjün etmek meselelerine gönükdirildi.
Gepleşikleriň dowamynda statistika, energetika, ulag we ekologiýa ýaly ugurlarda sebitara hyzmatdaşlygy ösdürmek, şeýle hem 2030-njy ýyla çenli Gün tertibini durmuşa geçirmek we Durnukly ösüş maksatlaryna ýetmek meseleleri ara alnyp maslahatlaşylar.
Şonuň bilen birlikde, BMG-niň Merkezi Aziýanyň ykdysadyýetleri üçin Ýörite maksatnamasyna (SPECA) gatnaşyjy döwletleriň Ministrler duşuşygy hem meýilleşdirilip, onda sebitde durnukly ulag-logistika arabaglanyşygyny berkitmek, sanlylaşdyrmak we «ýaşyl» özgertmeleri amala aşyrmak meselelerine aýratyn ähmiýet berler.
Türkmenistan 1992-nji ýyldan bäri ESCAP-yň doly hukukly agza döwleti bolup, sebitara hyzmatdaşlygy kämilleşdirmäge gönükdirilen halkara kararnamalaryň awtory hökmünde çykyş edýär.
