Amerikanyň aerokosmos agentligi (NASA) Aý şertlerinde oduň özüni alyp barşyny öwrenmäge gönükdirilen «FM2» (Flammability of Materials on the Moon) missiýasyny yglan etdi.
2026-njy ýylyň ahyrynda Aýyň üstüne gaty ýangyç nusgalary iberiler we Aýyň dartyş güýji şertlerinde ýangynyň aýratynlyklary hasaba alnar. Alymlaryň bellemegine görä, kosmosda ýangyn fizikasynyň Ýerdäkiden uly tapwudy bar: eger Ýer ýüzünde ýangyn konweksiýa sebäpli damja şekilli bolsa, mikrograwitasiýa şertlerinde ol sferik (togalak) görnüşe geçýär.
«FM2» taslamasynyň çägindäki deslapky çaklamalar Aýyň dartyş güýjüniň has hem howply bolup biljekdigini görkezýär, sebäbi käbir gurşawlarda alawyň ýaýraýyş tizligi grawitasiýa derejelerine baglydyr.
Alnan maglumatlar geljekde astronawtlar üçin has ygtybarly skafandrlary we ýaşaýyş modullaryny taslamakda ulanylar. «FM2» missiýasynyň şowly geçmegi «Artemis» maksatnamasynyň geljekki ekipažlarynyň howpsuzlygy bilen göni baglanyşyklydyr. Uzak möhletleýin geljekde inženerler dürli materiallaryň chydamlylygyny gönüden-göni Aýyň üstünde synagdan geçirmegi meýilleşdirýärler, bu bolsa ynsan oglunyň Aýda durnukly galmagy üpjün edilenden soňra mümkin bolar.
