Apple kompaniýasy baş direktoryň çalşylýandygyny yglan etdi: 2026-njy ýylyň 1-nji sentýabryndan başlap, kompaniýanyň ýolbaşçysy wezipesine Jon Ternus geçer. Soňky 15 ýylyň dowamynda Apple-e ýolbaşçylyk eden Tim Kuk bolsa ýerine ýetiriji başlyk wezipesini eýelär.
«Apple-iň baş direktory bolmak we şular ýaly ajaýyp kompaniýanyň ýolbaşçysy hökmünde maňa bildirilýän ynamdan peýdalanmak meniň durmuşymdaky iň uly mertebedir» – diýip, 65 ýaşly Kuk belledi.
Jon Ternus häzirki wagtda enjam üpjünçiligi boýunça uly wise-prezident wezipesini eýeleýär. Ol 2001-nji ýyldan bäri Apple-de işleýär we Mac, iPad hem-de AirPods bilen baglanyşykly esasy taslamalara gözegçilik etdi.
Kompaniýa ýolbaşçylaryň çalşylmagy baradaky habary 20-nji aprelde, gazna bazaryndaky söwdalar ýapylandan soň mälim etdi. Biržadan daşary söwdalaryň dowamynda Apple-iň paýnamalary birneme peseldi. Bu peselme kompaniýanyň biznesine berilýän bahanyň üýtgemegi bilen däl-de, habaryň garaşylmadyk wagtda yglan edilmegi bilen baglanyşdyrylýar we bu mejbury çäreler däl-de, ýolbaşçylygyň meýilleşdirilen tertipde geçirilmegidir.
Paýnamalaryň gysga möhletleýin üýtgemeleri maýadarlaryň täzelige bolan reaksiýasy bilen hem düşündirilýär. Şeýle-de bolsa, paýnama bahalary tiz wagtda durnuklaşdy.
Mundan ozal Financial Times neşiri Apple-iň täze ýolbaşçysyny 2026-njy ýylyň birinji ýarymynda yglan edip biljekdigini habar beripdi. Neşiriň maglumatyna görä, bu täze ýolbaşça ýylyň esasy wakalaryna — iýundaky işläp düzüjileriň maslahatyna we sentýabrda täze iPhone-laryň tanyşdyrylyşyna öňünden taýýarlanmaga mümkinçilik berer.
Tim Kuk Apple-de 1998-nji ýyldan bäri işleýär we 2011-nji ýylyň awgustynda Stiw Jobsuň ornuna geçip, kompaniýa ýolbaşçylyk edip başlady. Bu döwürde Apple-iň bazar gymmaty, takmynan, 350 milliard dollardan 2026-njy ýylyň 20-nji aprelindäki ýagdaýa görä 4 trillion dollardan gowrak möçbere çenli ýokarlandy.
