18-nji aprelde Türkmenistanyň daşary işler ministriniň orunbasary Mähri Bäşimowa Miranda Faýermanyň ýolbaşçylygyndaky Halkara Zähmet Guramasynyň (HZG) wekiliýeti bilen duşuşyk geçirdi.
Gepleşikleriň dowamynda taraplar zähmet gatnaşyklary ulgamynda anyk netijeleri gazanmak üçin esasy gural bolup hyzmat edýän 2026-njy ýyl üçin hyzmatdaşlygyň «Ýol kartasynyň» ýerine ýetirilişine üns berdi. HZG-niň wekiliýetiniň saparynyň amaly wezipeleriniň biri hem ýurduň welaýatlarynda döwlet edaralarynyň we jemgyýetçilik hyzmatdaşlaryň gatnaşmagynda bilelikdäki tegelek stol maslahatlaryny geçirmekden ybarat bolar.
Duşuşygyň dowamynda Türkmenistanyň kadalaşdyryjy binýadyny kämilleşdirmäge we halkara zähmet ülňülerini ornaşdyrmaga gönükdirilen HZG bilen özara gatnaşyklarynyň ulgamlaýyn häsiýeti bellenildi. Duşuşyga gatnaşyjylar 2025-nji ýylda geçirilen barlaglaryň netijelerine ýokary baha berdi we ýerlerde alynýan maglumatlaryň ähmiýetini nygtady.
Şeýle hem taraplar bilelikdäki başlangyçlary halkara maglumat giňişliginde has giňişleýin beýan etmegiň zerurdygyny ara alyp maslahatlaşdy. Duşuşygyň netijeleri boýunça Türkmenistanyň we HZG-niň wekilleri netijeli gepleşikleri dowam etdirmäge we hyzmatdaşlygy mundan beýläk-de ösdürmäge taýýardyklaryny tassyklady.
