2026-njy ýylyň maý aýynda Türkmenistanyň paýtagtynda Türki medeniýetiň halkara guramasynyň (TÜRKSOÝ) opera günleri we görnükli türkmen kompozitory Weli Muhadowyň doglan gününiň 110 ýyllygyna bagyşlanan dabaraly konsert geçiriler.
Sanly ulgam arkaly geçirilen Hökümet mejlisinde bu medeni-ynsanperwer çärelerine görülýän taýýarlyk barada wise-premýer Bahar Seýidowa hasabat berdi. Çäreleriň maksatnamasy türki halklaryň Umumy maddy we medeni gymmatlyklaryny gorap saklamaga hem-de saz sungatynyň nusgawy wekilleriniň döredijiligini wagyz etmäge gönükdirilendir.
Prezident Serdar Berdimuhamedow TÜRKSOÝ guramasy bilen hyzmatdaşlygyň okgunly ösdürilýändigini we bilelikdäki çäreleriň yzygiderli häsiýete eýedigini belledi. Döwlet Baştutany halklaryň arasyndaky dostlukly gatnaşyklary berkitmekde we ýaş nesli terbiýelemekde sazyň hem-de sungatyň ornuny nygtap, opera agşamlaryny ýokary derejede guramagy tabşyrdy.
Görnükli kompozitor Weli Muhadow 1916-njy ýylyň 5-nji maýynda doguldy. Ol türkmen akademik saz sungatynyň başlangyjynda duran şahsyýetleriň biridir. Ol Daňatar Öwezow, Aşyr Kulyýew we Adrian Şapoşnikow dagy bilen bilelikde ilkinji milli opera eserlerini döretmekde esasy orun eýelän kompozitor hasaplanýar.
Muhadowyň opera sungatyndaky iň ýokary derejesi hökmünde «Ganly saka» (1967) operasy görkezilýär. Bu eseriň librettosyny şahyr Çary Aşyrow özüniň adybir poemasynyň esasynda ýazypdy.
