Şu tomusda Beýik Britaniýanyň ýaşaýjylaryna elektrik energiýasyny has köp ulanmak üçin şert dörediler. Bu çäre mawy energiýa çeşmelerinden alynýan toguň aşa köpelmegi sebäpli energiýa ulgamyna düşýän agramy azaltmak maksady bilen amala aşyrylar.
«The Guardian» neşiriniň habar bermegine görä, «Neso» operatory şemal we Gün stansiýalarynyň iň ýokary öndürijilikli wagtynda hojalyklary köp tok sarp edýän enjamlary ulanmaga höweslendirmegi meýilleşdirýär. Ulanyjylardan kir we gap-gaç ýuwýan enjamlary işledip, elektromobilleri hem şol bir wagtda zarýadlamak haýyş ediler.
Energiýa üpjünçileri belli bir sagatlarda elektriki arzanladylan bahadan, hatda mugt hödürläp bilerler. Şeýle usul energiýa ulgamynyň deňagramlylygyny saklamak üçin ilkinji gezek ulanylýar.
Mundan ozal, 2019-njy ýylyň dekabrynda 2 million hojalyga iň az sarp edilýän sagatlarda pes nyrhly tarifler berlipdi. Indi bolsa, «Neso» bu çäräniň kömegi bilen elektrik energiýasyna bolan isleg örän pes wagtynda şemal we Gün desgalaryny mejbury ýagdaýda öçürmek üçin öndürijilere uly möçberde öwez puluny tölemekden gutulmagy niýet edinýär.
Şeýle-de bolsa, umumy energetika ýagdaýy durnuksyzlygyyna galýar. Ýangyç bahalarynyň gymmatlamagy sebäpli, 2026-njy ýylyň iýul aýyndan başlap, ýyllyk elektrik tölegleriniň 2000 funta çenli ýokarlanmagyna garaşylýar.
Muňa garamazdan, öňümizdäki tomus möwsümi taryha girip biler. Çünki onda gaýtadan dikeldilýän energiýanyň rekord derejä ýetmegi bilen bir hatarda, ýurduň energiýa ulgamynyň taryhda ilkinji gezek wagtlaýynça sap ekologik taýdan arassa (kömürturşy gazsyz) elektrik energiýasy bilen doly işlemegine garaşylýar.
