Alyaskanyň Utkiagwik şäherinde «ýarym gije Gün» döwri başlandy. Indiki 84 günüň dowamynda Gün ol ýerde gije-gündizläp gözýetimiň ýokarsynda galar.
Bu ýerde Gün 13-nji maýda sagat 02:57-de dogdy we meýilnama boýunça ol 2-nji awgusta çenli ýaşmaz.
Utkiagwik ABŞ-nyň iň demirgazyk şäheri hasaplanýar.
Ýarym gije Gününiň emele gelmegi Ýer okunyň gyşarmagy bilen baglanyşyklydyr we bu hadysany Polýar guşagynyň aňyrsynda ýerleşýän sebitlerde synlamak bolýar. Degişli döwürde Gün gözýetimiň çyzygyndan aşak düşmeýär, şonuň üçin hem gije diýlen düşünje umuman ýok bolýar. Bu aralykda ýerli ýaşaýjylar uky tertibini saklamak üçin ýagtylyk geçirmeýän galyň perdeleri ulanýarlar.
Demirgazyk ýarym şarynyň polýar sebitlerinde «polýar gündizliginiň» dowam edýän wagty, Antarktidada (Günorta ýarym şarda) häzir «polýar gijesi» höküm sürýär. Günorta polýusynda Gün eýýäm 21-nji martda ýaşypdy we indi ol ýeri 21-nji sentýabra çenli 6 aýlyk doly garaňkylyk gurşap alar. Amerikanyň «Amundsen-Skott» we Russiýanyň «Wostok» ylmy stansiýalarynda häzir gije-gündiz diýmän garaňky, howanyň temperaturasy bolsa -60...-70 °C-den hem aşakda.
