Özbegistandaky Yslam siwilizasiýasy merkezi dünýäde «Yslam siwilizasiýasynyň iň uly muzeýi» diýlip resmi taýdan ykrar edildi we Ginnesiň rekordlar kitabyna girizildi.
Rekordlar kitabynyň wekili Şeýda Subaşi degişli baýragy Merkeziň Ylmy geňeşiniň agzalaryna gowşurdy.
Subaşi «Toplumyň göwrümi, konseptual bitewüligi we amala aşyrylyş derejesi "Guinness World Records-yň" ölçeglerine doly laýyk gelýär» diýip bellemek bilen, bu taslamanyň taryhy miras bilen häzirkizaman muzeý tehnologiýalarynyň utgaşmagynyň özboluşly nusgasydygyny nygtady.
Binagär Abdukahhor Turdiýewiň aýtmagyna görä, toplumyň binagärlik gurluşy Özbegistanyň mirasyny we onuň dünýä siwilizasiýalarynyň özara gatnaşygyndaky ornuny görkezýär.
Häzirki wagtda bu toplum sebitiň iň gelim-gidimli ýerleriniň biridir. Ol her gün 5 000-e çenli myhmany kabul edýär.
Tutuş desga, takmynan, 10 gektar meýdany eýeleýär, binalaryň umumy meýdany bolsa 50 müň inedördül metre golaýdyr. Gümmeziň beýikligi 65 metre ýetýär.
Muzeýiň ruhy merkezi Gurhan zaly bolup, bu ýerde VII asyra degişli bolan we ÝUNESKO-nyň «Dünýä ýady» sanawyna girizilen gymmatly golýazma — Osman Mushafy saklanýar.
Şeýle hem merkezde sebitiň Galkynyş döwürleriniň dürli tapgyrlaryna bagyşlanan interaktiw ekspozisiýalar, sanly barlaghanalar we «Wagt kapsulalary» ýerleşýär. 2017-nji ýylda Şawkat Mirziýoýewiň başlangyjy bilen döredilen bu merkez yslamdan öňki we yslam döwürleriniň medeni gatlaklaryny birleşdirip, parahatçylyk, aň-bilim we hormat goýmak ideýalaryny öňe sürýär.
