Britaniýanyň iň uly banklaryndan biri bolan Lloyds Banking Group dünýäde ilkinji bolup, dolandyryş ulgamyna emeli aň (EA) kömekçisini girizdi. The Sunday Times neşiriniň habar bermegine görä, bu ädim EA-nyň strategik kararlar kabul edilýän iň ýokary basgançakda ulanylyp başlanandygyny aňladýar.
EA botuň esasy wezipeleriniň biri adalatlylyk bolup, ol karar kabul edilende adamyň şahsy garaýyşlarynyň täsirini azaltmaga kömek edýär, şeýle-de kiberhowpsuzlyk babatda maslahatlary berýär we ýapyk maglumatlary derňeýär.
«Board Intelligence» kompaniýasy tarapyndan döredilen bu bot örän ýokary goraglylyk derejesine eýe bolup, gizlin maglumatlaryň daşary çykmazlygyny-da birkemsiz üpjün edýär.
Häzirki wagtda bot esasan mejlisleriň taýýarlyk tapgyrynda ulanylýar. Geljekde onuň gepleşiklere we çekişmelere doly gatnaşmagy meýilleşdirilýär. Ýöne şeýle ygtybarly taraplarynyň bardygyna seretmezden, döredijiler EA-a ses bermek hukugynyň berilmegini «howply ädim» hasaplaýarlar.
Lloyds müşderileriniň sany boýunça Beýik Britaniýada ikinji orunda durýan bankdyr.
Bankyň hasaplamalaryna görä, 2025-nji ýylda EA gurallary 50 million funt-sterling möçberinde goşmaça bähbit getirdi. 2026-njy ýylyň ahyryna çenli bolsa bu görkezijini iki esse artdyrmak meýilleşdirilýär.
Bank IBM (International Business Machines Corporation) bilen bilelikde 9 aýlyk synagy tamamlady we ykdysady jenaýatlara garşy göreşmek üçin kwant tehnologiýalaryny EA bilen utgaşykly ulanmagy göz öňünde tutýar.
