2026-njy ýylyň 16–17-nji aprelinde Hywa şäherinde Merkezi Aziýa ýurtlarynyň we Germaniýanyň bilermenleriniň ilkinji forumy geçiriler. Fergana agentliginiň habar bermegine görä, bu çäräniň netijesinde yzygiderli işlejek täze bilermenler platformasyny döretmek meýilleşdirilýär.
Forumyň guramaçylary bolup, Özbegistanyň Prezidentiniň ýanyndaky Strategiki we sebitara barlaglar instituty, Konrad Adenauer we Fridrih Ebert adyndaky gaznalar çykyş edýär. Oňa Germaniýadan we sebit ýurtlaryndan 50-den gowrak bilermen – analitik merkezleriň ýolbaşçylary, ylym we biznes wekilleri gatnaşar. Forumyň gün tertibinde syýasy gepleşikler we ykdysady hyzmatdaşlyk, senagat hyzmatdaşlygy we sanly transformasiýa, bilim alyş-çalyşlary we zähmet migrasiýasy arkaly adam kapitalyny ösdürmek ýaly ugurlara garalar.
Täze döredilýän platforma «Merkezi Aziýa + Germaniýa» formatyna analitik goldaw berer. Bu format alty ýurdy – Türkmenistany, Gazagystany, Gyrgyzystany, Täjigistany, Özbegistany we Germaniýany birleşdirýär. Taraplar ykdysadyýet, energetika, ekologiýa we biznes ýaly möhüm pudaklarda hyzmatdaşlygy berkitmegi maksat edinýärler.
