Singapuryň eteginde ýaşaýan ýaşuly adamlaryň çalasynlygyny ösdürmek we durmuşda bolup biljek şikesleriň töwekgelçiligini azaltmak üçin, olara parkur öwredilýär. «South China Morning Post» neşiriniň ýazmagyna görä, bu taslama «geriatrik parkur» diýlip atlandyryldy.
Maksatnama 2017-nji ýylda başlandy. Ilkibaşda şeýle türgenleşikler gartaşan adamlara şikes ýetirer diýen howatyr bardy, emma wagtyň geçmegi bilen yzygiderli maşklaryň, tersine, sazlaşykly hereket etmegi gowulandyryp, gündelik durmuşda ýykylmalardan goranmaga kömek edýändigi belli boldy. Häzirki wagtda taslama 50 ýaşdan 83 ýaş aralygyndaky 20-ä golaý adam gatnaşýar.
Türgenleşdiriji Tan Şi Bun maşklaryň ýüze çykýan ýagdaýlara çalt reaksiýa bermäge kömek edýändigini belledi. Onuň aýtmagyna görä, ýaşuly adamlar, köplenç, deňagramlylygy ýitirmek we hereket sazlaşygynyň pesligi sebäpli şikes alýar.
Maksatnama gatnaşyjylar hem türgenleşikleriň oňat täsir edýändigini aýdýar. «Men özümi has janly duýýaryn. Bu düýbünden täze bir dünýä» – diýip, 69 ýaşly Betti Bun belledi.
67 ýaşly Aýrin Çua bolsa türgenleşikleriň netijesinde marketde agdarylan arabajygyň üstünden böküp geçip, ýykylmakdan halas bolandygyny gürrüň berdi.
Gatnaşyjylar özleriniň howply tilsimleri däl-de, gündelik durmuşda peýdaly bolan maşklary ýerine ýetirýändiklerini nygtaýar.
