Bütindünýä welosiped güni mynasybetli Türkmenistanda bedenterbiýe-sport we giň gerimli sagdyn durmuş çärelerini geçirmek meýilleşdirilýär.
Hususan-da, 3-nji iýunda paýtagtymyzda köpçülikleýin welosipedli ýöriş guralar. Şanly sene mynasybetli 30-njy maý — 3-nji iýun aralygynda ýurdumyzyň welaýatlarynda, Aşgabat we Arkadag şäherlerinde hem welosipedli ýörişler, sport ýaryşlary, ylmy-amaly maslahatlar hem-de wagyz-nesihat çäreleri guralar.
Bütindünýä welosiped güni halkara sport baýramy bolup, sagdyn durmuş ýörelgesini wagyz etmegi, welosipediň ekologik taýdan arassa we howpsuz, saglyk üçin peýdaly ulag serişdesidigine ünsi çekmegi maksat edinýär. Ol dünýäniň köp ýurtlarynda ilkinji gezek 2018-nji ýylyň 3-nji iýunynda bellenildi. Bu sene Türkmenistanyň başlangyjy boýunça Birleşen Milletler Guramasynyň Baş Assambleýasy tarapyndan esaslandyryldy.
