11-nji aprelde Türkmenistanyň Mejlisiniň ýedinji çagyrylyşynyň on ikinji maslahaty geçirildi. Onuň dowamynda ýurduň hukuk binýadyny döwrebaplaşdyrmaga we durmuş-ykdysady ösüşine gönükdirilen birnäçe kanun taslamalaryna garaldy we kabul edildi. Bu barada TDH habar berýär.
Maslahata gatnaşmaga degişli ministrlikleriň we pudaklaýyn edaralaryň wekilleri, şeýle hem köpçülikleýin habar beriş serişdeleri çagyryldy. Deputatlar Prezident Serdar Berdimuhamedow we Türkmenistanyň Halk Maslahatynyň Başlygy Gurbanguly Berdimuhamedow tarapyndan öňde goýlan wezipelere laýyklykda işlenip düzülen taslamalary maslahatlaşdy.
Esasy çözgütleriň hatarynda — 29-njy martda Lebap we Mary welaýatlaryndaky bäş saýlaw okrugy boýunça bäsleşik esasynda saýlanan deputatlaryň ygtyýarlyklaryny ykrar etmek meselesi bar.
Maslahatyň dowamynda aşakdaky resminamalar hem kabul edildi:
- Mejlisiň komitetleriniň düzümi hem-de Adam hukuklaryny we azatlyklaryny goramak baradaky komitetiň başlygy hakyndaky Kararlar;
- «Türkmenistanyň Administratiw hukuk bozulmalary hakynda kodeksine üýtgetmeler we goşmaçalar girizmek hakynda» Kanun (bu resminama käbir administratiw bozulmalary üçin jogapkärçiligi güýçlendirýär);
- Ulanylýan adalgalary döwrebaplaşdyrmak maksady bilen, «Howply önümçilik desgalarynyň senagat howpsuzlygy hakynda», «Buhgalterçilik hasaba alnyşy we maliýe hasabatlylygy hakynda», «Balyk tutmak we suw biologik serişdelerini gorap saklamak hakynda» we beýleki kanunçylyk namalaryna üýtgetmeler girizmek baradaky Kanunlar;
- «Migrasiýa hakynda» Türkmenistanyň Kanunyna üýtgetmeler we goşmaça girizmek hakyndaky Kanun. Täze kadalar daşary ýurt raýatlaryny we raýatlygy bolmadyk adamlary Döwlet migrasiýa gullugynyň maglumatlar ulgamynda hasaba almagyň, hasaba alnyşyň möhletini uzaltmagyň we hasapdan çykarmagyň elektron görnüşine geçmegini göz önünde tutýar.
Mundan başga-da, deputatlaryň öňünde Türkmenistanda adam hukuklary boýunça ygtyýarly wekil — Adalatçy Ý.Gurbannazarowa ýyllyk hasabaty bilen çykyş etdi.
Garalmaga hödürlenen kanunlaryň we kararlaryň ähli taslamalary biragyzdan makullanyldy we kabul edildi.
