10-njy aprelde Lebap welaýatynda geçirilen Ministrler Kabinetiniň göçme mejlisinde Mejlisiň Başlygy Dünýägözel Gulmanowa milli kanunçylygy kämilleşdirmek boýunça alnyp barylýan işler barada döwlet Baştutanyna hasabat berdi.
Häzirki wagtda Mejlis on ikinji maslahatyna taýýarlyk görýär. Onda Türkmenistanyň Konstitusiýasynyň ýörelgelerine we halkara hukugynyň umumy ykrar edilen kadalaryna laýyklykda işlenip düzülen kanun taslamalary maslahatlaşylar.
Gözden geçirmäge we soňra kabul etmäge aşakdaky kadalaşdyryjy hukuk namalarynyň taslamalary hödürlener:
- «Türkmenistanyň Administratiw hukuk bozulmalary hakynda kodeksine üýtgetmeler we goşmaçalar girizmek hakynda»;
- «Howply önümçilik desgalarynyň senagat howpsuzlygy hakynda» Türkmenistanyň Kanunyna üýtgetmeler girizmek hakynda»;
- «Buhgalterçilik hasaba alnyşy we maliýe hasabatlylygy hakynda» Türkmenistanyň Kanunyna goşmaçalar we üýtgetmeler girizmek hakynda»;
- «Türkmenistanyň käbir kanunçylyk namalaryna üýtgetmeler girizmek hakynda»;
- «Balyk tutmak we suw biologik serişdelerini gorap saklamak hakynda» Türkmenistanyň Kanunyna üýtgetmeler we goşmaçalar girizmek hakynda»;
- «Migrasiýa hakynda» Türkmenistanyň Kanunyna üýtgetmeler we goşmaça girizmek hakynda».
Prezident Serdar Berdimuhamedow hasabaty diňläp, döwrüň talaplaryna laýyk gelýän täze kanun taslamalaryny taýýarlamagyň wajypdygyny nygtady we bu ugurdaky işleri dowam etdirmegi tabşyrdy.
