Türkiýe hökümeti çilim çekmäge garşy göreşi tapgyrlaýyn güýçlendirip, 2040-njy ýyla çenli ýurtda temmäki önümleriniň söwdasyny doly togtatmagy göz öňünde tutýan täze kanun taslamasyny taýýarlaýar. Yeni Şafak neşiriniň habar bermegine görä, bu başlangyç birnäçe aýgytly ädimleri öz içine alýar.
Täze taslamada çilim çekmek gadagan edilen zolaklaryň gerimi has-da giňeler. Oňa döwlet binalary, okuw we saglygy saklaýyş edaralary, şeýle hem açyk meýdançalar girer. BirGün neşirinde aýdylyşy ýaly, restoranlarda we kafelerde çilim çekmäge diňe meýdany 20 inedördül metrden uly bolmadyk, daşyndan görünmeýän we hyzmat ediş işgärleri tarapyndan hyzmat edilmeýän aýratyn ýerlerde rugsat berler. 18 ýaşyna ýetmedikleriň bu ýerlere girmegine asla ýol berilmez.
Dükanlarda temmäki önümlerini tekjelerde açyk görkezmek gadagan ediler. Söwda elektron ulgamlar arkaly amala aşyrylar we alyjynyň ýaşy hökman barlanar.
Täze kanuna laýyklykda, dört ýyldan soň has berk çäreler durmuşa geçirilip başlanar. Esasy maksat – diňe bir adaty çilimleri däl, eýsem elektron çilimleri we ähli şoňa meňzeş enjamlary hem doly gadagan etmekden ybaratdyr. Bu düzgünleri bozanlara garşy örän berk jerimeler we sanksiýalar ulanylar.
