Amerikaly reper Kanýe West ilkinji gezek Stambulda konsert berip, Atatürk adyndaky Olimpiýa stadionyna takmynan 118 000 tomaşaçyny ýygnady. Anadolu agentliginiň habar bermegine görä, bu stadion konserti üçin täze dünýä rekordyny goýdy.
Öňki rekord 2025-nji ýylyň ýanwarynda Hindistanyň Ahmedabad şäherindäki Narendra Modi stadionynda 111 000 tomaşaçynyň öňünde çykyş eden britaniýaly Coldplay toparyna degişlidi.
West türk tomaşaçylaryna ýüzlenmek bilen: "Biz ähli döwürleriň iň köp tomaşaçyly stadion çykyşynyň rekordyny täzeledik!" - diýip yglan etdi.
Konsert onuň täze dünýä turunyň başyny başlady. Şüweleň NTRteam tarapyndan gurnaldy. Konserte diňe Türkiýeden däl, eýsem Beýik Britaniýadan, Germaniýadan, Fransiýadan, Niderlandlardan, Italiýadan, Russiýadan, Polşadan we Ýakyn Gündogardan hem janköýerler gatnaşdylar.
Stadion çykyşdan birnäçe sagat öň doldy. Iki sagada golaý dowam eden programma Father kompozisiýasy bilen başlandy we Stronger aýdymy bilen tamamlandy. Şeýle hem, aýdymlaryň sanawynda King, Runaway, Power, Flashing Lights, Heartless, All The Love we Homecoming aýdymlary bardy.
Şüweleňiň esasy aýratynlyklarynyň biri stadionyň merkezinde gurlan äpet uly sferiki sahnady. Proýeksiýa tehnologiýalarynyň kömegi bilen gurluş äpet uly globusa öwrüldi. Konsert yşyklandyryş effektleri, tüsse goýberiji gurluşlar we sinhronlaşdyrylan wizual proýeksiýalar bilen utgaşdy. Müňlerçe tomaşaçy arenany ykjam telefonyň çyralary bilen ýagtylandyrdy.
Myhmanlaryň köp gelmegi şäheriň ähli ýerinde metro hyzmatlarynda bökdençligiň döremegine sebäp boldy. Stansiýalarda we münüş-düşüş merkezlerinde uly märeke toplandy, stadionyň girelgesinde bolsa käbir tomaşaçylar petekleriniň QR kodlaryny skanirlänlerinde tehniki kynçylyklara duçar boldular.
