Aşgabatda Ýewropa gününe we Bütindünýä saglyk gününe bagyşlanan «Dostluk ganatlary: ÝB–Türkmenistan» atly köpçülikleýin ylgaw ýaryşy geçirildi. Ýewropa Bileleşiginiň Türkmenistandaky wekilhanasynyň habar bermegine görä, bu çäre hasaba alnan 650-den gowrak gatnaşyjyny birleşdirdi.
Ylgaw ýaryşy ÝB-niň Türkmenistandaky wekiliýeti tarapyndan Türkmenistanyň Bedenterbiýe we sport baradaky döwlet komiteti hem-de Aşgabat şäher häkimligi bilen bilelikde, Daşary işler ministrliginiň we «Run Rush» ylgaw jemgyýetiniň goldawy bilen guraldy.
Bu çäre 2025-nji ýylda geçirilen «Parahatçylyk we ynanyşmak marafonynyň» däplerini dowam etdirip, sport we jemgyýetçilik başlangyçlary arkaly ÝB bilen Türkmenistanyň arasyndaky hyzmatdaşlygy ösdürmäge gönükdirildi.
Ylgaw ýaryşyna Garaşsyzlyk seýilgähinde geçirilip, oňa dürli ýaşdaky we dürli taýýarlyk derejesindäki adamlar gatnaşdy. Ýaryş 2 km (maşgala görnüşli ylgaw), 5 km (höwesjeňler üçin) we 10 km (tejribeli we hünärmen gatnaşyjylar üçin) aralyklara ylgamagy, şeýle-de inklýuziw ylgawy öz içine aldy.
Çäre açylyş dabarasy we umumy maşklar bilen başlandy, soňra bolsa bellenilen aralyklar boýunça badalga berildi. Gatnaşyjylar we myhmanlar üçin göwün açyjy hem-de maşgala güýmenjeleri hem guraldy.
Menzili tamamlanlaryň ählisine ýadygärlik medallary gowşuryldy, her kategoriýa boýunça ýeňijiler bolsa hemaýatkärleriň baýraklary bilen sylaglandy.
Guramaçylar şular ýaly başlangyçlaryň sagdyn durmuş ýörelgesini öňe sürmäge, jemgyýetçilik gatnaşyklaryny ösdürmäge we hyzmatdaşlygy berkitmäge hyzmat edýändigini belleýär.
