Şu gün Aşgabat — Türkmenabat ýokary tizlikli awtomobil ýolunyň Mary — Türkmenabat böleginiň açylyş dabarasynyň çäklerinde Prezident Serdar Berdimuhamedowa desganyň ýokary hilini we tehnologik taýdan kämildigini tassyklaýan halkara şahadatnamalar gowşuryldy. Bu barada «Watan» habarlar gepleşiginde habar berildi.
Açylyş dabarasynda çykyş eden daşary ýurtly kompaniýalaryň wekilleri gurluşykda iň döwrebap inženerçilik çözgütleriniň ulanylandygyny nygtady.
Fransiýanyň «Grenobloise d’Elektronique et d’Automatismes» (GEA) kompaniýasy tarapyndan aşakdaky şahadatnamalar gowşuryldy:
- Töleg ulgamynyň we akylly wideogözegçilik ulgamynyň ýokary halkara ülňülerine laýyk gelýändigini tassyklaýan güwanama;
- ISO 9001: Töleg ulgamlarynyň taslamalaşdyrylyşy we tehniki hyzmaty boýunça işleriň hil şahadatnamasy;
- ISO 27001: Maglumat howpsuzlygynyň hem-de ulanyjylaryň şahsy maglumatlarynyň kiberhowplardan goraglylygynyň şahadatnamasy;
- ISO 14001: Ekologiýa jogapkärçiliginiň we işleriň daşky gurşawa ýetirýän täsirini azaltmaga gönükdirilendigini tassyklaýan şahadatnama;
- ISO 10012: Ölçeg enjamlarynyň takyklygy we ähli amallaryň aýdyňlygy baradaky şahadatnama.
Hytaýyň «Shandong Jiangfeng New Material Technology Co., Ltd.» kompaniýasy bolsa şu güwänamany gowşurdy:
- Ýol demir germewleriniň taslamasynyň we hasaplamalarynyň halkara ýol howpsuzlyk kadalaryna laýyk gelýändigini tassyklaýan güwänama. Gurluşykda ulanylan inženerçilik çözgütleri we materiallar ISO 1461 , ýewropa standarty EN1317 we halkara ýol howpsuzlygy kadalaryna doly laýyk gelýär.
Daşary ýurtly işewürler ulanylan materiallaryň çydamlylygyny we ygtybarlylygyny belläp, Türkmenistanyň döwrebap ulag infrastrukturasyny ösdürmekde mundan beýläk-de hyzmatdaşlyga taýýardyklaryny tassyklady.
Prezident Serdar Berdimuhamedow taslamanyň halkara derejesinde ykrar edilmeginiň BMG tarapyndan yglan edilen Durnukly ulag boýunça onýyllygynyň çäklerinde Türkmenistanyň ulag diplomatiýasynyň üstünligini görkezýändigini belledi.
