Habar berşimiz ýaly, Türkmenistanyň Prezidenti Serdar Berdimuhamedow Aşgabat — Türkmenabat ýokary tizlikli awtomobil ýolunyň Mary — Türkmenabat böleginiň açylyş dabarasyna gatnaşdy. Ýoluň bu böleginiň ulanmaga berilmegi paýtagty ýurduň gündogar sebiti bilen birleşdirýän 600 kilometrlik awtobanyň gurluşygynyň doly tamamlanandygyny alamatlandyrdy.
Taslamany durmuşa geçirmek işleri 2019-njy ýylda başlanypdy.
«Watan» habarlar gepleşiginiň berýän maglumatyna görä, täze ýol halkara ülňülerine doly laýyk gelýär we aşakdaky tehniki aýratynlyklara eýedir:
- Ýer düşeginiň giňligi: 34,5 metr.
- Zolaklaryň sany: 6 sany (her ugra 3 zolak).
- Ýol hereket böleginiň giňligi: her tarapdan 11,25 metr.
- Her zolagyň giňligi: 3,75 metr.
Ýol örtüginiň düzümi ýoluň netijeli gatlaklarynyň mäkämligini artdyrmak üçin ýokary hilli asfalt-betondan, sintetik örtükden, geogözeneklerden, torlarlardan we beýleki serişdelerden ybarat.
Awtomobil ýolunyň ugrunda ähli zerur infrastruktura: awtoduralgalar, dynç alyş zolaklary, ýangyç guýujy beketler we tehniki hyzmat ediş nokatlary guruldy. Howpsuzlyk köprüler we ýerasty geçelgeler arkaly üpjün edilýär.
Akylly wideogözegçilik ulgamy maglumatlary toplap, ýatda saklap, ýol gözegçilik gullugyna geçirýär.
Prezident Serdar Berdimuhamedow bu taslamanyň ýurduň ulag ulgamynyň geçirijilik ukybyny ep-esli artdyryp, sebitleriň ösüşine we halkara logistikasyna güýçli itergi berjekdigini nygtady.
Taslama Türkmenistanyň Senagatçylar we telekeçiler birleşmesiniň agzalary tarapyndan amala aşyryldy.
