Türkmenistanyň Halk Maslahatynyň Başlygy Gurbanguly Berdimuhamedow Awstriýa amala aşyran saparynyň dowamynda Türkmen-awstriýa jemgyýetiniň ýolbaşçysy Neda Berger bilen duşuşyk geçirdi. Bu barada TDH habar berýär.
Taraplar ikitaraplaýyn gatnaşyklaryň geljegini, şeýle hem iki ýurduň söwda, maliýe we maýa goýum hyzmatdaşlygyny ösdürmäge saldamly goşant goşýan Türkmen-awstriýa jemgyýetiniň işini maslahatlaşdy.
Ikitaraplaýyn gatnaşyklaryň medeni-ynsanperwer ugruna aýratyn üns berildi. Şunlukda, Gurbanguly Berdimuhamedowyň başlangyjy bilen döredilen «Galkynyş» türkmen-awstriýa simfoniki orkestriniň ähmiýeti bellenildi. Bu döredijilik topary iki ýurduň sazandalaryny birleşdirýär.
Hanym Neda Berger ikitaraplaýyn gepleşikleriň ösdürilmegine berýän ünsi üçin Gurbanguly Berdimuhamedowa minnetdarlyk bildirdi. Türkmenistanyň ýolbaşçylygy tarapyndan medeni-ynsanperwer gatnaşyklaryň goldanylmagy olary mundan beýläk-de ösdürmegiň binýady bolup hyzmat edýär diýip, Türkmen-awstriýa jemgyýetiniň ýolbaşçysy nygtady.
Taraplar ynsanperwer hyzmatdaşlygy mundan beýläk-de ösdürmäge taýýardyklaryny tassyklap, medeni hyzmatdaşlygyň ikitaraplaýyn gatnaşyklaryň ileri tutulýan ugurlarynyň biri bolup galjakdygyna ynam bildirdi.
