Türkmenistanyň daşary işler ministriniň orunbasary Ahmet Gurbanow Seul şäherinde migrasiýa we konsullyk ulgamlaryndaky hyzmatdaşlyk meselelerine bagyşlanan birnäçe duşuşyklary geçirdi. Bu barada Türkmenistanyň DIM-iniň metbugat gullugy habar berdi.
7-nji aprelde Ahmet Gurbanowyň Koreýa Respublikasynyň Immigrasiýa gullugynyň komissary Ça Ýong-ho bilen duşuşygy boldy. Gepleşikleriň dowamynda türkmen tarapy raýatlaryň birek-biregiň ýurtlaryna syýahat etmegi üçin amatly şertleri döretmek we olaryň hukuklarynyň goragyny üpjün etmek boýunça teklipleri öňe sürdi. Taraplar migrasiýa ulgamynda şertnama-hukuk esasyny kämilleşdirmegiň meselelerini maslahatlaşdy.
8-nji aprelde bolsa Koreýanyň daşary işler ministriniň köpçülikleýin diplomatiýa boýunça orunbasary Lim Sang-Wunyň gatnaşmagynda iki ýurduň Daşary işler ministrlikleriniň arasynda konsullyk meseleleri boýunça geňeşmeler geçirildi. Geňeşmelere gatnaşyjylar hyzmatdaşlygy işjeňleşdirmek üçin ýurtlaryň konsullyk gulluklarynyň arasynda yzygiderli tejribe alyşmagyň ähmiýetini nygtady.
Duşuşyklaryň netijeleri boýunça konsullyk we hukuk meseleleriniň ähli ugurlary boýunça hyzmatdaşlygy berkitmäge taýýarlyk tassyklanyldy.
