7-nji aprelde Koreýa Respublikasyna amala aşyran iş saparynyň çäklerinde Türkmenistanyň daşary işler ministriniň orunbasary Ahmet Gurbanow Koreýanyň ýokary okuw mekdeplerinde bilim alýan türkmen talyplary bilen duşuşyk geçirdi diýip, Türkmenistanyň DIM-i habar berýär.
Çäräniň esasy maksady ýaşlaryň durmuş we okuw şertleri bilen tanyşmakdan ybarat boldy. Daşary syýasat edarasynyň ýolbaşçysynyň orunbasary talyplara Watanda amala aşyrylýan giň gerimli özgertmeler we 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» diýen şygarynyň ähmiýeti barada gürrüň berdi.
Iki ýurduň arasyndaky gatnaşyklaryň täze derejä çykmagyna aýratyn üns berildi.
Hususan-da, diplomat 2026-njy ýylyň sentýabr aýyna meýilleşdirilen ilkinji «Merkezi Aziýa — Koreýa Respublikasy» sammitine görülýän taýýarlyklar we Prezident Serdar Berdimuhamedowyň bu ýurda meýilleşdirilýän sapary barada aýtdy.
Ministriň orunbasary talyplaryň okuw ýetişigi bilen gyzyklandy we döwletiň olaryň döwrebap bilim almagy üçin ähli şertleri döredýändigini nygtady.
