Gazagystanyň Almaty oblastynyň Garasaý raýonynda döwrebap kinopawilýonyň gurluşygyna badalga berildi. Bu taslama mynasybetli dünýä belli aktýor Jeki Çan özüniň simwolik «wagt kapsulasyny» sowgat hökmünde iberdi.
Meşhur kapsula gurluşyk meýdançasyna dikuçar arkaly getirilip, režissýor Robert Kuna dabaraly ýagdaýda gowşuryldy diýip, Mir-24 portaly habar berýär. Hut şu täze kinostudiýada meşhur aktýoryň gatnaşmagynda «Hudaýyň ýaraglary 4:Talap» («Доспехи бога 4: Ультиматум») atly filmiň surata düşürilmegi meýilleşdirilýär.
Taslamanyň prodýuseri Li Çiu Wa Jeki Çanyň gazagystanlylara gyzgyn salamyny we:«Mundan bary-ýogy alty aý ozal bu taslama diňe maslahatlaşylýan meýilnama hökmündedi. Bu gün bolsa gurluşygyň batly depginlerde barýandygyny görmek, diýseň guwandyryjy» diýen ruhubelent sözlerini ýetirdi.
Häkim Marat Sultangaziýewiň aýtmagyna görä, «Dala Stage Creative Tech Park» adyny alan bu desga sebitde çeper industriýanyň ösmegine güýçli itergi berer. Ol ýerli hünärmenlere dünýäniň öňdebaryjy studiýalary bilen bäsleşmäge şert döreder.
Şu ýylyň awgust aýynda tamamlanmagyna garaşylýan taslamanyň umumy meýdany 15 gektar, gurluşyk bölegi 3 000 inedördül metrdir.
Hakykatdan-da, bu kinostudiýa Jeki Çanyň täze filmi bilen birlikde, tutuş sebitiň kino sungatynyň beýgelmegi üçin hem möhüm binýatdyr.
