«Summer Game Fest» çäresiniň çäklerinde täze döredilen Paramount Games neşirýaty özüniň täze taslamasyny tanyşdyrdy. Gürrüň gaýtadan yglan edilen «Teenage Mutant Ninja Turtles: The Last Ronin» (Ninja pyşbagalar: Iň soňky Ronin) oýny barada barýar.
Bu oýnuň bardygy barada ilkinji gezek birnäçe ýyl ozal mälim edilipdi, ýöne Embracer Group kompaniýasynyň maliýe kynçylyklary sebäpli ony işläp taýýarlamak prosesi togtadylypdy.
Indi bolsa oýnuň önümçiligine Ýaponiýanyň PlatinumGames studiýasynyň jogap berýändigi mälim edildi. Bu topar üçin Ninja pyşbagalary baradaky ilkinji taslama däl, sebäbi olar ozal Activision Blizzard kompaniýasynyň sargydy boýunça meşhur komiks esasynda oýun çykarypdy.
«Iň soňky Ronin» oýnunyň wakalary tüm garaňky Nýu-Ýork şäherinde bolup geçýär. Ol ýerde Ninja pyşbagalary we olaryň halypasy Splinter, Şredderiň agtygy hem-de sintetiki ninjalar (robotlar) tarapyndan öldürilýär. Ýöne Mikelanjelo diri galmagy başarýar we indi ol öz doganlarynyň aryny almak isleýär.
Bu oýnuň esasy konsepsiýasy Ninja pyşbagalarynyň asyl döredijileri Kewin Istmen we Piter Lerd tarapyndan entek 1987-nji ýylda oýlanyp tapylypdy. 2010-njy ýylda Istmen şol wagtlar çap edilmän galan komiksiň 12 sahypasyny tapýar, soňra bolsa täzelenen seriýa IDW Publishing kompaniýasy tarapyndan neşir edilýär.
