Sony kompaniýasy «Sosial tor» (The Social Network) filminiň dowamy bolan «Sosial hasaplaşyk» (The Social Reckoning) atly täze filmiň ilkinji treýlerini hödürledi. Bu film «The Wall Street Journal» neşiriniň «Facebook» sosial torunyň gizlin işi barada geçiren ylmy-žurnalistik derňewine bagyşlanýar.
Filmiň režissýory we ssenariçisi Aaron Sorkin boldy. Ol mundan ozal Dewid Finçer tarapyndan surata düşürilen «Sosial toruň» ssenarisini ýazypdy.
Sýužet «The Wall Street Journal» amerikan gazetiniň 2021-nji ýylda çap eden derňewine esaslanýar. Onuň awtory žurnalist Jeff Horwis boldy. Şol materiallarda sosial ulgamyň ýetginjeklere ýetirýän zyýanly täsiri, şeýle hem dünýäde galp maglumatlaryň ýaýramagynda nähili rol oýnaýandygy jikme-jik açylyp görkezilýär.
Sosial toruň esaslandyryjysy Mark Sukerbergiň keşbini «Mirasdüşerler» serialy boýunça tanalýan Jeremi Strong ýerine ýetirdi. Žurnalist Horwisi bolsa «Aýy» serialynyň ýyldyzy Jeremi Allen Waýt oýnady. «Anora» filminiň baş gahrymany Maýki Medison bolsa «Facebook» kompaniýasynyň içerki resminamalaryny žurnalistlere aýan eden öňki inžener Frensis Hageniň keşbinde peýda boldy.
«Sosial hasaplaşyk» filmi 9-njy oktýabrda amerikan prokatyna çykar.
