Türkmenistanyň Prezidenti Serdar Berdimuhamedow duşenbe güni sanly ulgam arkaly sebitlerde dowam edýän ýazky meýdan işlerine we durmuş-ykdysady maksatnamalaryň durmuşa geçirilmegine bagyşlanan iş maslahatyny geçirdi. Maslahata oba hojalyk toplumyna gözegçilik edýän wise-premýer T.Atahallyýew we welaýatlaryň häkimleri gatnaşdy.
Hasabatlaryň esasy mowzugy bugdaý ekilen meýdanlara ideg etmek we gowaça ekişi baradaky çäreler boldy. Häzirki wagtda bugdaý meýdanlaryny mineral dökünler bilen iýmitlendirmek we ösüş suwuny tutmak işleri alnyp barylýar.
Döwlet Baştutany ylmy esasly agrotehniki kadalaryň doly berjaý edilmeginiň geljekki bol hasylyň binýadydygyny nygtady. Prezident gowaça ekişini bellenen möhletlerde tamamlamak üçin oba hojalyk tehnikalarynyň bökdençsiz işledilmegini üpjün etmegi tabşyrdy.
Tehniki ekinler bilen bir hatarda, içerki bazary öz önümlerimiz bilen üpjün etmek maksady bilen, ähli welaýatlarda ýazlyk ýeralma we gök-bakja ekinlerine ideg işleri hem işjeň alnyp barylýar.
Sebitlerde pile öndürmek möwsümi hem guramaçylykly dowam edýär. Daşoguz we Balkan welaýatlarynda ýüpek gurçugynyň saklanjak ýerlerini taýýarlamak we pileçi kärendeçileri ýüpek gurçugynyň tohumlary bilen üpjün etmek işleri tamamlanýar. Lebap we Ahal welaýatlarynda pileçi kärendeçiler gurçuklara ideg etmäge başlady.
Prezident döwlet meýilnamasyny ýerine ýetirmek üçin pile öndürijilere ähli zerur goldawyň berilmelidigini nygtady.
Maslahatyň dowamynda häkimler oba hojalygyndan başga-da, 2026-njy ýylda açylmagy meýilleşdirilýän medeni-durmuş we önümçilik maksatly desgalaryň gurluşyk depgini barada hasabat berdi. Döwlet Baştutany gurluşyk işleriniň ýokary hilli bolmagyny we bellenen möhletlerde tamamlanmagyny üpjün etmegi tabşyrdy.
Serdar Berdimuhamedow şeýle hem Bütindünýä saglyk gününe bagyşlanan köpçülikleýin sport we medeni çäreleri ýokary derejede guramagy tabşyrdy. Maslahaty jemläp, Prezident gatnaşyjylara öňde goýlan wezipeleri ýerine ýetirmekde üstünlikleri arzuw etdi.
