Germaniýanyň Leýpsig şäherinde geçirilen «Leipzig Eierlei» festiwalynda adaty pasha nyşany bolan ýumurtga hakyky sungat eserine öwrüldi. Ýewropanyň dürli künjeklerinden gelen suratkeşler kendir deregine örän näzik ýumurtga gabygynyň üsti bilen öz zehinlerini görkezdiler.
Euronews habarlar gullugynyň maglumatyna görä, bu ýylky sergä Germaniýadan, Polşadan, Belgiýadan, Çehiýadan we Beýik Britaniýadan 29 sany öz käriniň ussatlary gatnaşdy. Olar sergä jemi 8 müňe golaý eksponat getirdiler.
Suratkeşler öz ukyplaryny görkezmek üçin diňe bir towuk ýumurtgasyny däl, eýsem bedene, gaz, düýeguş, hatda totyguşlaryň kiçijik ýumurtgalaryny hem ulandylar. Sergä gelenlere takyk çyzyklara we simmetriýa esaslanýan dizaýnly, mum we boýag arkaly döredilýän gadymy ukrain nagyşlary, sebit we milli däp-dessurlary şöhlelendirýän sorb haşamlama nusgalary görkezildi.
«Ýumurtgalar dürli boýagly gaplarda reňklenilýär. Mumuň kömegi bilen belli bir tapgyrda reňklenmeli däl ýerler ýapylýar. Iň soňunda mum gyzdyrylyp aýrylýar we eser taýýar bolýar» diýip, nakgaş Agnes Martininçe inçe işiň syryny düşündirýär.
Milli nagyşlardan başga-da, sergide täzeçil äheňli işler hem görkezildi. Mysal üçin, ýumurtga gabygyndan ýasalan telefona meňzeş şekiller ýa-da asman jisimlerine çalym edýän, kiçijik globus kybap «asman ýumurtgalary» tomaşaçylaryň ünsüni çekdi.
Bu täsin festiwal indiki ýyl özüniň ýubileý – 30-njy sergisini 2027-nji ýylyň 6-7-nji martynda geçirmegi meýilleşdirýär.
