Şweýsariýanyň Brok şäherinde Maison Cailler şokolad fabrigini giňeltmegiň taslamasy hödürlenildi. Bu ýerde şokolada bagyşlanan uly syýahatçylyk desgasyny döretmek meýilleşdirilýär diýip, «The Sun» neşiri habar berýär.
Taslama täze desgalaryň gurluşygyny göz öňünde tutýar, bu bolsa toplumyň çägini ep-esli giňeltmäge mümkinçilik berer. Täzelikleriň arasynda kakao agaçlaryny saklaýan ýyladyşhanalar bolup, bu ýere gelýän myhmanlar şokolad öndürmek üçin ulanylýan çig malyň ösüş prosesini görüp biler.
Şeýle hem Emporium zolagynda degustasiýa zalyny we dükan açmak meýilleşdirilýär. Esasy özüne çekiji desgalaryň biri bolsa «uçýan teatr» — Şweýsariýanyň üstünden wirtual syýahat edýän attraksion bolar.
Fabrigiň 1898-nji ýylda gurlan taryhy binalary dikeldiş işlerinden soň ilkinji gezek myhmanlar üçin açylar, ol ýerde mowzuklaýyn sergiler ýerleşdiriler. Atelier du Chocolate ussahanasy üç esse giňeldiler. Meýilnamada asma ýoluny we goşmaça myhmanhanalary gurmak hem göz öňünde tutulýar.
Taslama goýulýan maýa goýumlaryň möçberi 400 million şweýsar frankyna (500 million ABŞ dollaryndan gowrak) deň bolar. Gurluşyk işleri şu ýyl başlar, açylyş dabarasy bolsa 2030-njy ýyla meýilleşdirilýär. Işler tamamlanandan soň, gelýän syýahatçylaryň sanynyň ýylda 500 müňden 1,2 million adama çenli artmagyna garaşylýar.
