Şweýsariýanyň Baden we Wettingen şäherlerinde «0-njy ugur» diýen at bilen üýtgeşik taslama badalga berildi. Bu taslamanyň çäginde gatnaýan awtobusuň kesgitli bir ugry, wagt tertibi we soňky duralga nokady ýokdur.
Ýolagçylar ulaga münen wagty onuň nirä gitjekdigini öňünden bilmeýärler. Guramaçylaryň aýtmagyna görä, bu taslamanyň maksady adamlaryň gündelik birsydyrgyn durmuşyna garaşylmadyk, adaty däl pursatlary goşmak we olary birsyhly ýaşaýyş kadasyndan çykarmakdyr.
Bu geň awtobus 30-njy aprel bilen 16-njy maý aralygynda hepdede üç gatnawy amala aşyrdy. EDnews neşiri öz maglumatynlarynda taslamanyň jemgyýetde örän uly gyzyklanma döredendigini belleýär. Käte awtobusuň ugraýan ýerinde oňa münmek isläp, garaşýanlaryň sanynyň 100-e ýetýän wagty-da bolýar.
