Günorta Gyrgyzystanyň daglarynda tebigaty söýüji bir adam seýrek duş gelýän guşuň - garaguşuň höwürtgesini tapdy.
Höwürtgede eýýäm per-ganat çykaran guş jüýjesi bardy, ýöne golaýynda uly guş ýokdy. Ony barlap, şikes almandygyna göz ýetirensoň, ol adam guşy biynjalyk etmezlik üçin o ýerden gaýtdy.
Ekolog Azamat Kožomkulow garaguşlaryň Gyrgyzystanda duş gelýän iň uly ýyrtyjy guşlardygyny düşündirdi. Olaryň ganatlarynyň uzynlygy 2,5 metre ýetip bilýär.
"Garaguşlar Gyrgyzystanyň daşky gurşawyny goraýjylardyr. Olar hapa aýryjylaryň we gabyr gazyjylaryň işini ýerine ýetirýärler. Olaryň esasy iýmiti maslyk - iri haýwanlaryň galyndylarydyr. Rowaýata görä, bu maslykçy guşlar uzak ýaşaýarlar. Hakykatdanam, olar beýleki guşlara garanda haýal ýetişýärler, olara ulalmak üçin köp wagt – birnäçe ýyl gerek. Olar örän haýal ösýärler we köpelýärler. Şonuň üçin her bir guş jüýjesi gymmatlydyr.
Garaguşlar 30 ýyldan köp ýaşamaýarlar. Garaguşlar haýwanat dünýäsinde möhüm halka bolup durýar: olar haýwanlaryň maslygyny ýok edýärler we şeýlelik bilen, epizootiýanyň ýaýramagynyň öňüni alýarlar. Gyrgyzystanda garaguşlar döwlet tarapyndan goralýar" - diýip, ol belledi.
